Cristiano Ronaldo vendosi një standard të jashtëzakonshëm në Champions League në sezonin 2013/14, kur realizoi plot 17 gola me fanellën e Real Madridit, një shifër që prej vitesh duket thuajse e paarritshme.
Por ndryshimi i formatit të kompeticionit mund ta bëjë këtë rekord më të prekshëm. Me fazën e ligës dhe numrin më të madh të ndeshjeve, një skuadër që shkon deri në finale mund të luajë deri në 17 takime, duke u dhënë sulmuesve më shumë mundësi për të shkruar historinë.
Disa prej yjeve më të mëdhenj të futbollit europian kanë tashmë shifrat dhe formën për t’iu afruar “malit” të Ronaldos.
Kylian Mbappé është një prej kandidatëve kryesorë. Francezi realizoi 15 gola në Champions sezonin e kaluar, ndërsa Reali u eliminua në gjysmëfinale. Me formën e mirë që ka treguar edhe në La Liga, atij i duhen vetëm dy gola për të barazuar rekordin e portugezit.
Erling Haaland mbetet gjithmonë një kërcënim për çdo rekord golash. Norvegjezi shënoi 8 gola në Champions sezonin e kaluar, ndërsa në të gjitha kompeticionet realizoi 30 herë. Nëse ruan ritmin dhe përfiton nga numri i madh i ndeshjeve në formatin e ri, 17 golat nuk janë një objektiv i pamundur.
Harry Kane ka treguar tashmë se është një makineri golash. Sulmuesi i Bayern Munichut ka regjistruar shifra të jashtëzakonshme në sezonet e fundit, me 14 gola në Champions sezonin e kaluar dhe 61 gola në total. Ritmi i tij e vendos padyshim mes kandidatëve seriozë.
Raphinha është një tjetër emër që po tërheq vëmendjen. Braziliani ka shpërthyer në rolin e tij të ri më pranë portës dhe e ka nisur sezonin në mënyrë fantastike. Për të kapur Ronaldon i duhet një ritëm ekstrem, por forma e tij e fundit e bën një kandidat për t’u mbajtur në vëmendje.
Në listë hyn edhe Ousmane Dembélé, i cili është kthyer në një nga protagonistët kryesorë të PSG-së. Francezi ka treguar se mund të jetë vendimtar në Europë dhe një seri ndeshjesh në Champions mund ta vendosë edhe atë në garën për shifra të jashtëzakonshme.
Rekordi i 17 golave të Cristiano Ronaldos mbetet një nga standardet më të frikshme të Champions League. Por me formatin e ri dhe me këtë brez sulmuesish, ajo që dikur dukej thuajse e pamundur, tashmë mund të jetë një sfidë reale.
