Një burrë nga Brazili ka hyrë në Librin e Rekordeve Guinness pasi puthi partneren e tij plot 195 herë brenda vetëm 30 sekondave, duke vendosur një rekord të ri botëror.
Çifti brazilian, Renato Alves dhe Naiara Roberta Ribeiro de Marins, arritën të realizojnë 195 puthje në vetëm gjysmë minute, duke u bërë mbajtësit e rekordit për numrin më të madh të puthjeve në 30 sekonda nga një çift. Rekordi u vendos pak ditë pas Ditës Ndërkombëtare të Puthjes, e cila shënohet më 6 korrik.
Sipas çiftit, ata vendosën të pranonin sfidën falë lidhjes së tyre të fortë dhe bindjes se janë “çifti më i mirë në botë”. Renato tha se për të ky rekord nuk kishte të bënte vetëm me fitimin e një tjetër titulli, por edhe me dëshirën që emri i Naiarës të mbetej përgjithmonë pranë të tij në Librin e Rekordeve Guinness.
32-vjeçari nuk është i panjohur për rekordet botërore. Ai ka fituar më parë disa tituj Guinness, mes tyre rekordin për kohën më të shpejtë në vendosjen dhe rrëzimin e 10 librave, vetëm 6.68 sekonda, si dhe rekordin për rrotullimin më të madh të këmbës te meshkujt, me një kënd prej 210.66 gradësh.
Renato, i cili mban rripin e zi në taekwondo, e përshkruan veten si “i varur nga fitoret” dhe beson se tashmë është braziliani me numrin më të madh të rekordeve botërore. Gjatë sfidës ai mbante veshur fanellën e ekipit të tij të preferuar të futbollit, São José E.C., ndërsa puthte me shpejtësi faqen e Naiarës, e cila buzëqeshi gjatë gjithë provës.
Megjithatë, çifti nuk ka ndërmend të ndalet me kaq. Ata synojnë të thyejnë edhe rekordin për numrin më të madh të puthjeve në një minutë, i cili aktualisht mbahet nga japonezët Cherry Yoshitake, i njohur si Mr. Cherry, dhe Kumiko Shiratori, me 277 puthje.
