Një aksident me motor ka ndodhur mesditën e së dielës në aksin rrugor Sarandë–Ksamil, pranë zonës së njohur si Manastiri. Dy të rinj, që ndodheshin në Sarandë për pushime, po udhëtonin me motor në drejtim të Ksamilit kur ndodhi ngjarja.
Sipas burimeve zyrtare, 21-vjeçari italian Giussepe Dani, i cili drejtonte motomjetin me targa BV183, humbi kontrollin dhe u rrëzua. Së bashku me të në motor ndodhej edhe e reja shqiptare, Artena Llani.
Të dy pësuan plagë si pasojë e rënies dhe u transportuan menjëherë drejt Spitalit të Sarandës. Fatmirësisht, gjendja e tyre shëndetësore raportohet të jetë jashtë rrezikut për jetën.
