Andrea Cavallari, 26-vjeçari i dënuar për tragjedinë e ndodhur në dhjetor 2018 në diskotekën Lanterna Azzurra në Corinaldo, është zhdukur pas një lejeje të përkohshme nga burgu i Bolonjës. Ai përfitoi nga një autorizim i gjykatës për të dalë pa shoqërim policor me qëllim mbrojtjen e temës së diplomës në Jurisprudencë në Universitetin e Bolonjës. Pas përfundimit të ceremonisë, Cavallari u largua me të dashurën dhe nuk është kthyer më në strukturë, duke shkelur urdhrin gjyqësor dhe duke u bërë i pakapshëm prej disa ditësh.
Cavallari është një nga shtatë të dënuarit për ngjarjen tragjike të shkaktuar nga e ashtuquajtura “banda e spërkatjes”, e cila përmes përdorimit të sprajit djegës brenda klubit shkaktoi panik të madh që çoi në vdekjen e gjashtë personave dhe plagosjen e dhjetëra të tjerëve. Banda përbëhej nga të rinj të moshës 19–22 vjeç, të specializuar në grabitje gjatë eventeve muzikore. Ai është dënuar me 11 vite e 10 muaj burg për vrasje të shumëfishtë, grabitje dhe lëndime personale.
Sindikata e policisë së burgjeve ka reaguar pas këtij incidenti, duke kërkuar një rishikim të procedurave që lejojnë të dënuarit të përfitojnë leje të përkohshme. Sekretari i përgjithshëm i Sappe, Giovanni Battista Durante, theksoi nevojën për përfshirje më të madhe të policisë së burgjeve në vlerësimin e rrezikshmërisë së të burgosurve para se të jepet leje. Ndërkohë, edhe një tjetër anëtar i grupit, Riccardo Marchi, është dënuar për pjesëmarrje në ngjarje, megjithëse pretendon se nuk ka qenë i pranishëm atë natë.
