Një automjet luksoz tip “Benz”, prodhim i viteve të fundit, është sekuestruar në Fier pasi rezultoi i shpallur në kërkim nga Interpol Manchester. Automjeti u ndalua për verifikim nga Seksioni për Hetimin e Trafiqeve në DVP Fier, në kuadër të operacionit për kontrollin e burimit të të ardhurave për blerjen e automjeteve luksoze.
Gjatë verifikimeve, policia konstatoi se automjeti ishte në kërkim ndërkombëtar nga Interpol Manchester dhe vijoi me sekuestrimin e tij. Për këtë rast u procedua në gjendje të lirë shtetasi E. D., 26 vjeç, banues në Mallakastër, për veprën penale “Trafikimi i mjeteve motorike”.
Materialet procedurale iu referuan Prokurorisë së Fierit për veprime të mëtejshme. Policia njoftoi se operacionet për goditjen e veprimtarive kriminale dhe evidentimin e rasteve të trafikimit të mjeteve motorike dhe armëmbajtjes pa leje do të vijojnë.
