Nuk është hera e parë që dëgjojmë çmendurira nga sektori i Shëndetësisë përsa i përket shpërdorimit dhe abuzimit me paratë e shqiptarëve. Titullarët e institucioneve shtetërore kanë marrë çdo kompetence për të futur në xhepat e oligarkëve paratë e popullit, për sa kohë që s’ka institucion që i heton. E nuk është as hera e parë që trajtojmë dyshen përfituese për të cilën do të shkruajmë në këtë artikull, pasi të dy janë klientë shumë të njohur të qeverisë.
Bëhet fjalë pikërisht për kompanitë EVITA, dikur në pronësi të Majlinda Fetahut, kushërirës së Allajbeut, fituese në mënyrë të dyshimtë duke mos patur asnjë eksperiencë, e koncesionit të Hemodializës bashkë me Spitalin Amerikan të administruar po ashtu nga Allajbeu dhe PEGASUS të shqiptaro-grekut Janis Karathano, fitues i Koncesionit të Laboratorëve. Dyshja e famshme e tenderave të kripur të Shëndetësisë po bën namin me paratë publike, duke i fituar ato pa u munduar fare, se i vijnë në thasë me porosi pa konkurruar me askënd edhe me 100% të Fondit Limit të procedurës publike. Edhe këtë herë është autoritet prokurues Qendra Kombëtare e Transfuzionit të Gjakut në një tender me vlerë 707 MLN Lekë për blerje kite reagente për testimin e gjakut me metodën NAT që do të thotë, Testimi i Amplifikuar me Acid Nukleik, një metodë sensitive e testimit të gjakut për detektimin e virusit të Hepatitit C, Virusit Imunodeficent, etj, pra me pak fjalë për detektimin e infeksioneve të mundshme nëpërmjet transmetimit të gjakut.
Tenderi është shënuar normalisht me FLAMUR TË KUQ për Mungesë Konkurrence, duke e nxjerrë dyshen me shkelje për pjesëmarrje pa garë.
DOKUMENTET E TENDERIT / SPECIFIKIMET TEKNIKE
