Kompania “4 S” SHPK ka fituar së fundmi një tjetër tender furnizimi me ushqime. Këtë herë, institucioni me të cilin ka lidhur marrëveshje është Bashkia e Durrësit, e drejtuar nga Emiriana Sako.
Sipas të dhënave zyrtare, firma në fjalë do të marrë nga Bashkia e Durrësit rreth 93 milionë Lekë për ta furnizuar institucionin me fruta e zarzavate.
Më herët, Gazet Atdheu raportoi se si “4 S”, një kompani që zotërohet nga djali i një biznesmeni të dënuar për një çështje korrupsioni me tenderat, lidhi një kontratë 50 mln Lekë me Agjencinë e Blerjeve të Përqendruara.
Korrupsioni me tenderat
Kompania “4 S” SHPK me seli qendrore në Lushnje, sipas të dhënave në Qendrën Kombëtare të Biznesit, është në pronësi të Xhino Sinanit.
Pronari i “4 S” SHPK Xhino Sinani është djali i Shemsi Sinanit.
Ky i fundit u arrestua nga Policia e Shtetit më 11 Korrik 2016 bashkë me biznesmenë të tjerë.
Prangosja erdhi pasi Prokuroria për Krime të Rënda kishte zbuluar një rast korrupsioni në tenderat e ushqimeve për Drejtorinë e Përgjithshme të Burgjeve, ku ishin përfshirë kompanitë e biznesmenëve të arrestuar.
Mes tyre, dhe ajo e Shemsi Sinanit.
Në vitin 2018, Gjykata për Krime të Rënda e dënoi me 4 vite burg Shemsi Sinanin për këtë çështje.
/Gazetaatdheu.com/