Protesta kundër kryeministrit Edi Rama ka marrë një dimension ndërkombëtar, duke u zhvilluar paralelisht edhe në kryeqendrën e Bashkimit Evropian, Bruksel. Ky tubim i diasporës shqiptare, i mbushur me flamuj kombëtarë dhe thirrje për drejtësi, u zhvillua pikërisht në ditën e konferencës ndërqeveritare mes Shqipërisë dhe BE-së, një moment kyç për integrimin evropian. Protestuesit kërkuan dorëheqjen e kryeministrit Rama dhe tërhoqën vëmendjen e institucioneve evropiane mbi shqetësimet për demokracinë, pavarësinë e institucioneve dhe sundimin e ligjit në Shqipëri. Ata theksuan se procesi i integrimit nuk duhet të jetë thjesht teknik, por i shoqëruar me reforma të vërteta dhe respektim të parimeve demokratike.
Një element i rëndësishëm i kësaj proteste ishte mbështetja e marrë nga liderë të lëvizjeve studentore evropiane, duke i dhënë asaj një peshë më të gjerë. Presidenti i Studentëve Demokratë Europianë (EDS), Francesco Sismondini, iu bashkua protestuesve duke deklaruar se rinia shqiptare është kthyer në një burim frymëzimi për të rinjtë në mbarë Europën. Në fjalën e tij, Sismondini theksoi se të rinjtë europianë po përballen me sfida të ngjashme nga qeveritë që ai i cilësoi autoritare, duke e parë lëvizjen shqiptare si një shembull të gjallë rezistence. “Studentë, po lind një lëvizje e re në Europë dhe ne jemi këtu për t’ju mbështetur”, u shpreh ai, duke e mbyllur fjalimin me thirrjen “Rama ik!”.
Kjo protestë në Bruksel nuk është një ngjarje e izoluar. Ajo është pjesë e një vale më të gjerë proteste që përfshin diaspora në SHBA, Gjermani, Itali e më gjerë. Duke kërkuar zgjedhje të lira dhe institucione të pavarura.
