Sipas denoncimit, familja po udhëtonte drejt një gëzimi familjar, kur një automjet u preu rrugën në bulevard. Pas një sinjali me bori, që sipas tyre ishte vetëm për t’i kujtuar shoferit se kishin përparësi, situata degradoi menjëherë.
Shoferi i automjetit tjetër dyshohet se u afrua paralelisht, hapi xhamin dhe nisi të ofendonte familjen. Më pas, ai i ndoqi për disa minuta, i parakaloi dhe u bllokoi rrugën. Sipas pamjeve, agresori zbret nga makina dhe godet automjetin me grushte, ndërsa brenda ndodheshin dy fëmijë të mitur dhe dy gra.
Familja pretendon se njëra prej vajzave, e cila vuan nga ADHD, u traumatizua nga ngjarja dhe shpërtheu në lot, ndërsa drejtuesi i mjetit zgjodhi të ruante qetësinë për të shmangur përshkallëzimin e konfliktit.
Edhe më shqetësues është pretendimi se një patrullë policie ndodhej pas tyre gjatë gjithë incidentit, por nuk ndërhyri për të ndaluar agresorin. Sipas denoncuesit, efektivët u nisën për pak çaste pas automjetit, pa përdorur sirenat, dhe më pas u larguan pa marrë asnjë masë.
Familja thotë se telefonoi edhe numrin 112, por pretendon se mori vetëm përgjigjen për t’u paraqitur për kallëzim, pavarësisht se policia kishte qenë e pranishme në vendngjarje.
Denoncuesi kërkon që rasti të bëhet publik jo për të nxitur urrejtje apo hakmarrje, por që autori i dyshuar të identifikohet dhe të përballet me ligjin. Ai u bën thirrje komentuesve të shmangin gjuhën e urrejtjes dhe nxitjen e dhunës, duke theksuar se kërkon vetëm drejtësi për atë që familja e tij përjetoi.
