Euro ka shënuar sot një rënie të fortë në tregun valutor shqiptar, duke zbritur për herë të parë nën nivelin historik prej 94 lekësh. Sipas Bankës së Shqipërisë, një euro u këmbye me 93.88 lekë, me një rënie të lehtë ditore prej 0.19 lekësh, duke shënuar gjithashtu nivelin më të ulët të vitit.
Që nga fillimi i vitit, monedha europiane është zhvlerësuar me rreth 3%, ose afro 3 lekë, ndërsa mesatarja e saj për periudhën janar–korrik 2025 është 95.8 lekë, krahasuar me 97.8 lekë mesatarja e vitit të kaluar. Në plan afatgjatë, euro ka rënë me mbi 31% krahasuar me vitin 2015, kur këmbehej rreth 139.7 lekë.
Ekspertët e tregut e lidhin këtë rënie me hyrjen e lartë të valutës në vend nga investimet informale, ndërtimi dhe turizmi, që në vitin 2025 ka kaluar 12 milionë vizitorë. Ndërsa zhvlerësimi i euros ndihmon importuesit dhe ul kostot e borxhit të jashtëm, ai po dëmton eksportuesit, sektorin e turizmit dhe remitancat e emigrantëve që këmbehen me më pak lekë.
