Është ndarë nga jeta në moshën 78-vjeçare aktori i njohur nga Zelanda e Re, Sam Neill, i famshëm për rolin e doktor Alan Grant në sagën “Jurassic Park”, si dhe për paraqitjet e tij në serialin “Peaky Blinders” dhe dhjetëra filma të tjerë. Familja njoftoi se aktori u nda nga jeta të hënën, më 13 korrik, në Sydney të Australisë, i rrethuar nga njerëzit e tij të afërt. Shkaqet e vdekjes nuk janë bërë publike, ndërsa familja deklaroi se ndarja e tij nga jeta ishte e papritur.
Neill kishte bërë të ditur më herët se në vitin 2022 ishte diagnostikuar me limfomë angioimunoblastike të qelizave T, një formë e rrallë e kancerit të gjakut në stadin e tretë. Aktori kishte njoftuar se ishte shëruar pas trajtimit dhe se në momentin e vdekjes nuk vuante më nga sëmundja. Familja falënderoi stafin e Spitalit Privat St Vincent për kujdesin e treguar dhe kërkoi respektimin e privatësisë gjatë kësaj periudhe zie.
I lindur në vitin 1947 në Irlandën e Veriut dhe i rritur në Zelandën e Re, Sam Neill nisi karrierën e tij në fund të viteve ’70 me filmin “Sleeping Dogs”, përpara se të bëhej një emër ndërkombëtar me role në “The Piano”, “The Hunt for Red October”, “Omen III” dhe veçanërisht “Jurassic Park”. Gjatë karrierës së tij të gjatë ai u nominua disa herë për çmime si Golden Globe dhe Primetime Emmy, ndërsa la gjurmë si një nga aktorët më të njohur të kinemasë australiane dhe ndërkombëtare.
