Një apel prekës për ndihmë ka mbërritur për vogëlushen Katalea, e cila në vetëm 10 ditët e para të jetës po përballet me sfidën më të madhe: luftën për të mbijetuar.
Katalea lindi më 6 korrik, por u diagnostikua me një defekt të rëndë në zemër që kërkon ndërhyrje urgjente kirurgjikale jashtë Shqipërisë. Në vend që të jetë në krahët e nënës së saj, ajo ndodhet prej ditësh në një inkubator, e lidhur me aparatura që e mbajnë në jetë.
Pranë saj, një nënë që nuk resht së qari dhe një motër 8-vjeçare që refuzon të largohet nga spitali pa motrën e vogël, duke e pritur çdo ditë me kukullën në duar.
Shpresa e vetme për Katalean është transportimi sa më parë drejt një spitali të specializuar jashtë vendit, ku do t’i nënshtrohet një operacioni në zemër. Megjithatë, gjendja e saj shëndetësore nuk lejon udhëtimin me një fluturim të zakonshëm. Foshnja ka nevojë për transport të specializuar mjekësor, një procedurë që kushton shumë dhe është e papërballueshme për familjen.
Për të ndihmuar në mbledhjen e fondeve të nevojshme, Fondacioni Firdeus ka hapur edhe një fushatë GoFundMe, ku çdo kontribut, sado i vogël, mund të bëhet një hap më pranë shpëtimit të jetës së Kataleas.
Prindërit e saj u bëjnë thirrje të gjithë shqiptarëve që kanë mundësi të kontribuojnë, në mënyrë që vogëlushja të ketë shansin të marrë trajtimin që i nevojitet urgjentisht.
Çdo ndihmë ka vlerë. Për Katalean, çdo minutë është jetike.
