Një tjetër procedurë e dyshimte prokurimi publik është finalizuar nga Bashkia e Durrësit, ku qindra milionë lekë nga taksat e qytetarëve u janë besuar procedurave me hije të forta fiktiviteti.
Bëhet fjalë për tenderin me objekt “Blerje dru zjarri e pellet për QEA”, me numër reference REF-87870-05-28-2026 dhe me një fond limit prej 37,805,936.00 lekë të reja ose rreth 378 milionë lekë të vjetra pa TVSH.
Ofertat “sa për sy e faqe” dhe kapja e 99.6% të fondit limit
Sipas dokumenteve zyrtare të renditjes së ofertave, në këtë garë kanë marrë pjesë vetëm dy operatorë ekonomikë:
- Gjergj Buça P.F. – Oferta: 37,661,600.00 Lekë (Fituesi)
- WOODPECKER shpk – Oferta: 37,792,800.00 Lekë
Nga analiza e vlerave bie menjëherë në sy diferenca minimale mes fondit limit dhe ofertave të paraqitura:
- Oferta e fituesit Gjergj Buça kap shifrën 99.6% të fondit limit, duke lënë vetëm një ulje simbolike prej më pak se 0.4%.
- Oferta e dytë e kompanisë WOODPECKER shpk është thuajse ngjitur me tavanin e fondit limit, çka ngre dyshime të bazuara se pjesëmarrja e saj ka shërbyer thjesht si “numër” apo ofertë mbuluese (shoqëruese) për t’i dhënë procedurës formën e një konkurrence ligjore, ndërkohë që vlera maksimale e parave publike është përthithur plotësisht.
Kush është fituesi? Biznesi “gjithçkabërës”: Nga drutë e zjarrit, te parukeria, moteli e sallonet e modës
Analiza e të dhënave të regjistrit tregtar për subjektin fitues Gjergj Buça (Person Fizik – NIPT: K31331547R) zbulon detaje edhe më alarmante.
Objekti i tij i aktivitetit është një listë e pafundme shërbimesh që shtrihen në çdo sektor të mundshëm imagjinar. Subjekti deklaron se merret me:
- Tregtim e përpunim lënde drusore dhe shërbime në pyje;
- Pastrim ambientesh, lavanderi dhe pastrim kimik;
- Hapje bar-bufe, restorant, parukeri, sallon mode, qendër estetike, fitness, servis, lavazh, motel e agjenci imobiliare;
- Tregtim karburanti, gazit të lëngshëm, pajisjeve elektronike, konfeksioneve e produkteve bujqësore.
Përveç këtij profili “kamaleon”, të dhënat publike tregojnë se ky person fizik numëron mbi 55 kontrata me institucionet publike, ku në pjesën dërrmuese të rasteve shënohet si konkurrues i vetëm ose në procedura me mungesë gare reale tregtare.
Taksat e qytetarëve në udhëkryq
Marrja e tendersave publikë me vlera me qindra milionë lekë duke u afruar në mënyrë kirurgjikale me fondin limit, e shoqëruar nga operatorë me objekte veprimtarie gjithëpërfshirëse nga parukeritë te drutë e zjarrit, mbetet një nga skemat më të përdorura për shpërndarjen e fondeve publike pa garë të mirëfilltë ekonomike.
A do të ketë një verifikim nga organet e kontrollit apo SPAK për kualifikimin dhe vlerësimin e ofertave në Bashkinë e Durrësit? Qytetarët vazhdojnë të paguajnë, ndërsa paratë publike përfundojnë nëpër kontrata me “fitues” të paracaktuar.
