Një fqinj deklaroi për gazetën Die Üelt se 21-vjeçari Abdul B. kishte muaj që mburrej se po përgatiste një sulm dhe shprehte vazhdimisht pakënaqësi për jetën e tij në Gjermani. Kjo pakënaqësi e vazhdueshme ndaj jetës në vend vinte si pasojë e mospërshtatjes dhe ndjesisë se nuk po gjente vendin e duhur, çka u shoqërua me qëndrime radikale dhe konflikte të mëparshme.
Kjo ngjarje e rëndë ka tronditur kryeqytetin gjerman mbrëmjen e së shtunës gjatë zhvillimit të Paradës së Krenarisë (Pride), ku një furgon u përplas me turmën e njerëzve, duke lënë pas një grua të vrarë dhe 16 persona të plagosur. Sipas informacioneve nga autoritetet dhe mediat, Policia e Berlinit ka identifikuar të dyshuarin kryesor si 21-vjeçarin Abdul B., një shtetas gjerman me origjinë libaneze i cili ishte liruar në muajin maj nga një qendër rehabilitimi për të mitur.
Pas ngjarjes, hetimet kanë zbardhur detaje të reja nga profili dhe lëvizjet e të dyshuarit. Pak pas orës 01:00 të natës, forcat e policisë bastisën një apartament në lagjen Schöneberg, jo shumë larg vendit ku po zhvillohej Pride, ku Abdul B. jetonte me nënën dhe vëllezërit e motrat e tij. Megjithatë, kur forcat e rendit mbërritën në banesë, ajo rezultoi e boshatisur.
Autoritetet njoftuan gjithashtu se ende nuk është konfirmuar përfundimisht nëse Abdul B. ishte drejtuesi i furgonit apo nëse në sulm kanë marrë pjesë persona të tjerë, ndërsa automjeti u gjet bosh dhe i dëmtuar rëndë në vendngjarje. Për shkak të dyshimeve se autori mund të ketë bashkëpunëtorë në arrati, Policia e Berlinit ka ftuar çdo qytetar që ka informacion për vendndodhjen e tij që të kontaktojë portalin e policisë ose të paraqitet në çdo komisariat.
