Pas përfundimit të protestës së zhvilluar përpara Kuvendit të Shqipërisë, aktivisti Arben Kola ka lënë mjediset e Komisariatit Nr. 1, ku ishte shoqëruar nga forcat e rendit. Gjatë një prononcimi për median, ai ka komentuar me ironi ngjarjen, duke pretenduar se shoqërimi i tij erdhi pasi policët ishin bërë “xhelozë” nga fakti që ai përmendte në megafon kryeministrin Edi Rama e jo efektivët e pranishëm.
Kola sqaroi se nuk kishte kryer asnjë veprim të paligjshëm, përveç përsëritjes së thirrjeve të zakonshme të protestës. Gjatë fjalës së tij, ai rikujtoi thirrjen e përdorur gjatë tubimit: “Edi Rama i pabesë, ju me gaz, ne me vezë”.
Sipas informacioneve të dhëna prej tij, krahas dy personave të liruar tashmë, pritet që në orët në vijim të lirohen edhe dy protestues të tjerë që ndodheshin të shoqëruar.
