Detaje të reja kanë dalë në dritë lidhur me sulmin terrorist që tronditi Berlinin gjatë Paradës së Krenarisë, ku mbeti e vdekur një grua dhe u plagosën 29 persona të tjerë. Babai i autorit të dyshuar, 21-vjeçarit Abdul Ballout, ka dhënë një intervistë për revistën gjermane Der Spiegel, ku ka deklaruar se i biri ishte radikalizuar nga ideologjia e organizatës terroriste Shteti Islamik (ISIS).
Nga Libani, ku jeton aktualisht, 64-vjeçari tregoi se kishte folur me të birin në telefon vetëm disa orë përpara se të kryente aktin e dhunshëm. “Ai më tha se i mungoja dhe se do të donte të ishte me ne në Liban në atë kohë”, tha ai, ndërsa mohoi me forcë çdo lidhje të familjes me ideologjinë e ISIS-it. “Ne jemi shiitë, nuk e mbështesim atë. Djali im u radikalizua dhe përqafoi rrymën sunite”, u shpreh ai.
Hetimet e udhëhequra nga Zyra e Prokurorit Federal të Gjermanisë tregojnë se Ballout ishte radikalizuar prej kohësh dhe kishte tentuar disa herë t’i bashkohej ISIS-it. Ai ishte arrestuar në Liban në vitin 2025, ndërsa në maj të vitit 2026 u dënua në Berlin me një vit e dhjetë muaj burg për planifikimin e një akti të rëndë dhune kundër shtetit. Pas lirimit, ai ndodhej nën mbikëqyrje dhe pritej të përfshihej në një program deradikalizimi.
Dyshimet kryesore janë se 21-vjeçari mori me qira një furgon të bardhë dhe u përplas me shpejtësi mbi turmën e pjesëmarrësve në parkun Tiergarten. Brenda mjetit u gjet edhe një telefon celular që u lidh me të. Pas përplasjes me një pemë, Ballout doli nga furgoni dhe sulmoi kalimtarët me hanxhar përpara se të arratisej.
Ai u lokalizua më vonë nga policia në një kopsht komunitar në lagjen Spandau, ku u qëllua për vdekje pasi sulmoi efektivët gjatë tentativës për arrestim.
Në kuadër të hetimit, policia gjermane kishte ndaluar fillimisht një shtetas iranian, me dyshimin se mund të kishte qenë në automjet. Megjithatë, provat e mbledhura nuk i konfirmuan këto dyshime dhe ai u lirua nga paraburgimi. Hetuesit po vijojnë punën për të përcaktuar nëse Abdul Ballout veproi tërësisht i vetëm apo nëse kishte bashkëpunëtorë të tjerë.
