Aksidenti tragjik te rrethi i TEG-ut, ku humbën jetën dy shtetas egjiptianë të punësuar nga kompania “Alba-Beton”, ngre dyshime serioze mbi respektimin e ligjit, kontrollet institucionale dhe përgjegjësinë e drejtpërdrejtë të punëdhënësit.
Sipas të dhënave zyrtare të bëra publike nga DPSHTRR, drejtuesi i autobetonieres nuk kishte leje drejtimi shqiptare dhe nuk rezultonte i pajisur me Dëshmi Aftësie Profesionale (DAP), një dokument kyç dhe i detyrueshëm për drejtimin e mjeteve të tilla të rënda. Më tej, hetimet zbuluan se leja e drejtimit egjiptiane që ai dispononte kishte skaduar në momentin e aksidentit.
Kjo ngre një pyetje themelore: Si mund të vihej në timonin e një autobetoniereje një person pa asnjë dokumentacion të vlefshëm?
Përgjegjësia këtu nuk mbaron te shoferi. Në çdo kompani ndërtimi apo transporti ekziston një zinxhir i qartë përgjegjësie. Para se një punonjës të ulet në timon, dikush ka për detyrë të verifikojë vlefshmërinë e patentës, njohjen e saj ligjore në Shqipëri, certifikatat profesionale dhe lejet e punësimit. Nëse këto procedura nuk janë ndjekur, çështja nuk është thjesht një gabim individual, por ngre përgjegjësi të rënda administrative dhe penale për drejtuesit e kompanisë që e lejuan atë të dilte në rrugë.
Pse nuk është njoftuar ende një hetim ndaj kompanisë “Alba-Beton”?
Institucionet duhet t’u japin urgjentisht përgjigje pesë pyetjeve kryesore:
- Kush e verifikoi patentën e shoferit?
- Kush kontrolloi vlefshmërinë e saj?
- A ishte e njohur ligjërisht kjo leje drejtimi në Shqipëri?
- A ishte pajisur shoferi me Dëshminë e Aftësisë Profesionale?
- A janë respektuar procedurat ligjore për punësimin e shtetasve të huaj?
Në një shtet ligjor, çdo aksident me përfundim fatal duhet të ndiqet nga një hetim i plotë, i paanshëm dhe pa asnjë kompromis. Nëse provohet se kompania ka lejuar drejtimin e një automjeti të rëndë nga një person pa dokumentacionin e kërkuar, përgjegjësit duhet të përballen me ligjin, pavarësisht emrit të kompanisë apo ndikimit të pronarëve të saj.
