Në administratën shqiptare duket se transferimet nuk zgjidhen gjithmonë me firmë, por ndonjëherë edhe me grusht. Një punonjës i Policisë Bashkiake të Tiranës, 31-vjeçari Adi Hazizi, ka përfunduar në pranga pasi dyshohet se ka goditur shefin e Sektorit të Mbikëqyrjes së Territorit, Skënder Delija, brenda ambienteve të institucionit.
Sipas informacioneve paraprake, konflikti shpërtheu pasi Hazizi u njoftua për transferimin e tij në një sektor tjetër. Fillimisht pati debat verbal, por situata degradoi dhe dyshohet se punonjësi e goditi me grusht shefin.
Vetë Skënder Delija ka deklaruar se dhuna lidhet drejtpërdrejt me detyrën, pasi ishte ai që i komunikoi vartësit vendimin e drejtuesve për transferimin. Nga një njoftim rutinë, ngjarja përfundoi në një dosje penale.
