Vijojnë pa ndërprerje kërkimet për gjetjen e minatorit Ilir Kolaveri, i cili dyshohet se u aksidentua gjatë punës në minierën e kromit në Tërnovë. Ngjarja ndodhi të shtunën, ndërsa sipas informacioneve paraprake, 40-vjeçari ka rënë në një furnelë brenda galerisë dhe është zënë poshtë nga një masiv minerali.
Menjëherë pas njoftimit për aksidentin, në vendngjarje mbërritën ekipet e shpëtimit, të cilat prej mesditës së së shtunës po punojnë për lokalizimin dhe nxjerrjen e minatorit. Operacioni vijon në kushte të vështira për shkak të terrenit dhe rrezikut për shembje të tjera brenda minierës.
Miniera e kromit në Tërnovë administrohet nga kompania “Eternal Security”, ndërsa autoritetet kanë nisur hetimet për të zbardhur rrethanat e aksidentit. Hetimet synojnë të përcaktojnë shkaqet e ngjarjes dhe nëse janë respektuar standardet e sigurisë në punë.
