WhatsApp po teston një funksion të ri që do t’u mundësojë përdoruesve të dërgojnë mesazhe tekstuale që mund të lexohen vetëm një herë, përpara se të zhduken automatikisht. Deri më tani, kjo veçori ishte e disponueshme vetëm për fotografitë, videot dhe mesazhet zanore, ndërsa tani kompania synon ta zgjerojë edhe për mesazhet me tekst.
Funksioni është zbuluar në versionet beta të WhatsApp për iPhone dhe Android. Pasi të shkruajnë një mesazh, përdoruesit do të kenë mundësinë të zgjedhin opsionin “Dërgo si mesazh që lexohet vetëm një herë”, duke bërë që ai të fshihet menjëherë pasi marrësi ta hapë dhe ta lexojë.
Për të rritur privatësinë, mesazhet nuk do të mund të kopjohen, përcillen apo ndahen me përdorues të tjerë, ndërsa aplikacioni pritet të bllokojë edhe fotografimin dhe regjistrimin e ekranit. WhatsApp nuk ka njoftuar ende një datë zyrtare për lançimin e funksionit, por testimi në versionet beta tregon se ai mund të jetë i disponueshëm së shpejti.
