Një ngjarje tragjike ka ndodhur mbrëmjen e kësaj të diele në plazhin e Pishporos, në Fier, ku një 49-vjeçar ka humbur jetën vetëm pak çaste pasi ishte futur në det.
Viktima është identifikuar si Durim Dogani, 49-vjeç. Sipas informacioneve paraprake, ai ka shfaqur probleme të menjëhershme shëndetësore sapo kishte hyrë në ujë, duke alarmuar pushuesit që ndodheshin pranë.
Personat e pranishëm kanë njoftuar menjëherë shërbimet e emergjencës, por pavarësisht ndërhyrjes, 49-vjeçari nuk ka mundur të mbijetojë.
Nga të dhënat paraprake dyshohet se shkak i humbjes së jetës ka qenë një arrest kardiak, megjithatë shkaku i saktë pritet të përcaktohet nga ekspertiza mjeko-ligjore.
Ndërkohë, policia ka nisur veprimet procedurale për zbardhjen dhe dokumentimin e plotë të rrethanave të kësaj ngjarjeje të rëndë, që e ktheu një ditë pushimi në tragjedi për familjen e 49-vjeçarit.
