Ka ndërruar jetë Beqir Devolli, drejtuesi dhe pronari i automjetit tip “Mercedes-Benz”, që shpërtheu nga tritoli të shtunën pranë Drejtorisë së Policisë në Gjirokastër. Ai humbi jetën në orët e para të mëngjesit të së dielës, teksa transportohej me ambulancë drejt Spitalit të Traumës në Tiranë.
Në automjet ndodhej edhe Rigers Mela, i cili mbeti i plagosur nga shpërthimi, por fatmirësisht ndodhet jashtë rrezikut për jetën.
Dyshimet paraprake janë se shënjestra e atentatit ishte Rigers Mela, pasi rreth një vit më parë atij iu dogj një automjet tip “Range Rover” në zonën e Dunavatit, në Gjirokastër. Policia vijon hetimet për zbardhjen e plotë të ngjarjes dhe identifikimin e autorëve.
