Vatra e zjarrit në masivin pyjor të Drenies vijon të jetë aktive edhe gjatë ditës së sotme. Pavarësisht ndërhyrjes nga ajri gjatë ditës së djeshme, zjarri u riaktivizua në mesnatë, ndërsa flakët iu afruan edhe banesave. Ndërhyrja e shpejtë e shërbimeve zjarrfikëse dhe forcave të ushtrisë shmangu përhapjen e flakëve drejt zonave të banuara.
Aktualisht, zjarri ka marrë përhapje të gjerë, ndërsa situata po monitorohet nga forcat e ushtrisë dhe zjarrfikësit. Ekipet në terren po punojnë për izolimin dhe neutralizimin e vatrave, pavarësisht vështirësive të krijuara nga terreni i thyer dhe kodrinor.
Ndërkohë, sipas informacioneve nga Prefektura e Fierit, është bërë kërkesë për ndërhyrje nga ajri për të ndihmuar në shuarjen e zjarrit. Forcat në terren vijojnë të jenë në gatishmëri për të parandaluar përhapjen e flakëve drejt banesave dhe zonave të tjera përreth.
