Thirrjet për mbylljen e Gjykatës Speciale në Hagë, të shtuara pas dënimit të katër ish-krerëve të UÇK-së, kanë marrë një përgjigje nga Zyra e Prokurorit të Specializuar. Institucioni ka bërë të qartë se mandati i tij nuk përfundon me kërkesa apo deklarata politike, por vijon sipas procedurave të përcaktuara në kuadrin ligjor të Gjykatës Speciale.
Në një përgjigje për Radion Evropa e Lirë, Zyra e Prokurorit të Specializuar ka sqaruar se mandati vazhdon derisa të përfundojnë hetimet dhe çdo procedurë që buron prej tyre. Pra, përfundimi i mandatit lidhet me mbylljen e proceseve përkatëse dhe jo me kërkesat për shpërbërjen e institucionit.
Sipas Zyrës së Prokurorit të Specializuar, pasi hetimet dhe procedurat të kenë përfunduar, është Këshilli i Bashkimit Evropian ai që njofton zyrtarisht institucionet e Kosovës. “Mandati i Zyrës së Prokurorit të Specializuar vazhdon derisa Këshilli i Bashkimit Evropian t’i njoftojë institucionet e Kosovës se hetimet dhe çdo procedurë që rrjedh prej tyre kanë përfunduar”, thuhet në përgjigjen e saj.
