Google është gjobitur me 403 milionë euro nga Komisioni i Mbrojtjes së të Dhënave (DPC) në Irlandë, për mënyrën se si kompania ka përdorur të dhënat e vendndodhjes së përdoruesve. Gjoba, një nga më të mëdhatë e vendosura nga autoriteti irlandez, pasoi një hetim të nisur gjashtë vite më parë pas ankesave të organizatave evropiane për mbrojtjen e konsumatorëve.
Sipas DPC, hetimi zbuloi se Google kishte përpunuar të dhënat e vendndodhjes në mënyrë që nuk ishte “e ligjshme”, “e drejtë” dhe “transparente”. Hetimi përfshiu periudhën nga 25 maji 2018 deri më 4 shkurt 2020 dhe shqyrtoi mënyrën e përpunimit të të dhënave përmes tre funksioneve: Aktiviteti i Uebit dhe i Aplikacioneve, Historiku i Vendndodhjes dhe Saktësia e Vendndodhjes. Autoriteti konstatoi se praktikat e kompanisë shkelën kërkesat e Rregullores së Përgjithshme për Mbrojtjen e të Dhënave (GDPR).
Përveç gjobës, Google është urdhëruar të sjellë përpunimin e të dhënave në përputhje me ligjin brenda gjashtë muajve. Nga ana e saj, kompania tha se çështja lidhet me politika historike që janë përditësuar ndërkohë. Google theksoi se që prej vitit 2019 ka ndryshuar ndjeshëm praktikat e saj dhe ka prezantuar mjete të reja për menaxhimin e të dhënave të vendndodhjes, përfshirë opsionet që lejojnë përdoruesit të vendosin fshirjen automatike të të dhënave çdo tre, 18 ose 36 muaj.
