Çmimet e naftës po vijojnë trendin rënës për të gjashtën ditë radhazi, teksa në tregje po shtohen pritshmëritë për një zbutje të tensioneve në Lindjen e Mesme. Në qendër të vëmendjes janë bisedimet e reja mes Shteteve të Bashkuara dhe Iranit, ndërsa Arabia Saudite po punon për rikthimin në funksion të një prej rrugëve alternative më të rëndësishme për eksportet e saj të naftës.
Kontratat për naftën Brent shënuan të mërkurën një rënie prej rreth 1%, duke zbritur në 98,3 dollarë për fuçi. Në të njëjtën kohë, nafta amerikane West Texas Intermediate (WTI) humbi rreth 1,5%, duke u tregtuar në 89 dollarë për fuçi.
Presioni mbi çmimet lidhet kryesisht me sinjalet se negociatat mes Uashingtonit dhe Teheranit mund të kenë shënuar përparim. Një marrëveshje diplomatike do të reduktonte shqetësimet e tregjeve për ndërprerje të zgjatura të furnizimit me energji nga Lindja e Mesme.
Presidenti amerikan Donald Trump tha se zyrtarët amerikanë kishin zhvilluar një takim “shumë produktiv” me përfaqësuesit iranianë. Ai gjithashtu deklaroi se administrata e tij po shqyrton nëse do të ndjekë rrugën e negociatave për një marrëveshje apo do të ndërmarrë hapa më të ashpër ndaj Iranit.
Trump pritet të zhvillojë më vonë gjatë javës edhe takime me drejtues të vendeve të tjera të Gjirit Persik.
Irani lidh hapjen e Hormuzit me heqjen e bllokadës
Në sfondin e negociatave, një zyrtar i lartë iranian bëri të ditur se Teherani i ka përcjellë Uashingtonit një propozim që lidhet me Ngushticën e Hormuzit.
Sipas deklaratës, nëse SHBA-ja ndërmerr hapa për të hequr bllokadën që ka kufizuar ndjeshëm eksportet iraniane të naftës, Teherani do të ishte i gatshëm të rihapte ngushticën brenda shtatë ditësh.
Ngushtica e Hormuzit është një pikë kyçe për tregun global të energjisë, pasi përmes saj kalon një pjesë e rëndësishme e transportit detar të naftës bruto dhe produkteve të naftës. Çdo përmirësim i situatës atje do të mund të ulte shqetësimet për furnizimin ndërkombëtar.
Arabia Saudite përgatitet të rikthejë një rrugë alternative eksporti
Një tjetër faktor që po ndikon në pritshmëritë e tregut është Arabia Saudite. Riadit synon të rikthejë brenda ditëve të ardhshme në funksion naftësjellësin East-West, duke i dhënë mundësi vendit të transportojë sërish naftën përmes një rruge që anashkalon Ngushticën e Hormuzit.
Rikthimi i këtij korridori do të ulte varësinë e eksporteve saudite nga rruga detare përmes Hormuzit dhe do t’u jepte tregjeve një alternativë shtesë në rast të problemeve me transportin në këtë zonë.
Kombinimi i zhvillimeve diplomatike mes SHBA-së dhe Iranit me përpjekjet e Arabisë Saudite për rikthimin e naftësjellësit East-West po zbut shqetësimet mbi furnizimin global. Kjo po ushtron presion të mëtejshëm mbi çmimet e naftës.
Megjithatë, tregu mbetet i ndjeshëm ndaj çdo zhvillimi të ri. Ecuria e negociatave mes Uashingtonit dhe Teheranit, si dhe situata në Ngushticën e Hormuzit, mund të ndryshojnë shpejt pritshmëritë për furnizimin global dhe, rrjedhimisht, edhe drejtimin e çmimeve të naftës.
