Nga Ministria e së Vërtetës.
Në një konferencë shtypi të thirrur me urgjencë, legjenda e kinematografisë për të rritur, Roko Sifredi, njoftoi sot tërheqjen e tij përfundimtare nga industria, duke cituar si shkak kryesor “konkurrencën e pandershme dhe të papërballueshme” që po vjen nga zyrat sekrete të Tiranës.
Sipas Sifredit, zbulimi i mesazheve të fundit mes kryetares së SHISH-it dhe Ergys Agasit ka vënë në dyshim të gjithë karrierën e tij tridhjetëvjeçare.
“Mendoj se kam parë gjithçka në këtë jetë, por kur lexova se si Ergysi kontrollonte me një dorë shërbimin sekret dhe me tjetrën ndërtonte marrëdhënie që do të bënin edhe Don Zhuanin të duartrokiste, kuptova se jam amator,” deklaroi Sifredi mes lotësh, duke fshirë ballin me një pecetë mëndafshi. “Ai djali nuk po bën thjesht diplomaci; ai po rishkruan rregullat e atraksionit. Më fëlliqi, thjesht më fëlliqi profesionalisht.”
Sifredi shtoi se pas leximit të transkripteve të bisedave, ka kaluar dy ditë në depresion të thellë në vilën e tij, duke pyetur veten se ku kishte gabuar.
“Ne në Itali përdorim skenarë, drita, kamera dhe prapë se prapë përfundojmë duke dukur si klounë përballë narrativës natyrale të Agasit,” vijoi ai. “Këtu nuk flasim më për filma me kartela memorie, flasim për operacione të nivelit shtetëror ku zemrat, mesazhet dhe shërbimet sekrete bien të gjitha në të njëjtin rrjet. Unë nuk i mbaj dot më ritmet e Tiranës.”
Zërat brenda industrisë thonë se Sifredi po planifikon të hapë një akademi të re trajnimi, ku do të ftojë Ergys Agasin si profesor vizitor për lëndën “Menaxhimi i Burimeve Njerëzore dhe Çështjeve të Zemrës në Shërbimet Inteligjente”.
