Mbi 1 milion llogari bankare në Shqipëri kishin nga zero deri në 100 lekë në fund të vitit 2025. Shifra përbën rreth 34,5% të të gjitha llogarive të individëve dhe vjen në një kohë kur të dhënat për depozitat tregojnë se pjesa më e madhe e parave është përqendruar në një numër shumë më të vogël llogarish.
Sipas të dhënave të Agjencisë së Sigurimit të Depozitave, nga rreth 2,93 milionë llogari bankare të individëve, 1.011.375 kishin një gjendje prej jo më shumë se 100 lekësh. Me fjalë të tjera, pothuajse një në tri llogari rezultonte thuajse bosh.
Por shifra nuk do të thotë se mbi një milion shqiptarë janë pa para apo kursime. I njëjti person mund të ketë disa llogari në banka të ndryshme, ndërsa paratë mund t’i mbajë në një llogari tjetër. Të dhënat tregojnë gjendjen e llogarive në fund të vitit, jo pasurinë apo të ardhurat e secilit qytetar.
Një tjetër e dhënë që bie në sy është shpërndarja e depozitave. Rreth 1,78 milionë llogari kishin nga 100 lekë deri në 2,5 milionë lekë, me depozita që kapnin vlerën totale prej 567,8 miliardë lekësh.
Ndërkohë, 137.554 llogari kishin mbi 2,5 milionë lekë. Edhe pse përbëjnë vetëm 4,7% të llogarive të analizuara, në to gjendeshin 819,6 miliardë lekë, ose rreth 59% e vlerës së depozitave.
Pra, ndërsa më shumë se një milion llogari kanë thuajse zero para, pjesa më e madhe e depozitave mbahet në një numër relativisht të vogël llogarish. Megjithatë, këto shifra nuk tregojnë sa persona zotërojnë paratë dhe as nuk mjaftojnë për të përcaktuar nivelin e varfërisë në vend.
Të dhënat janë pjesë e dokumentacionit që shoqëron projektligjin për sigurimin e depozitave. Propozimi parashikon rritjen e kufirit të sigurimit nga 2,5 milionë në 6 milionë lekë për çdo depozitues në një bankë, duke filluar nga 1 korriku 2027. Kufiri aktual është i pandryshuar që prej vitit 2009.
