Aeroporti ndërkombëtar i Riadit, kryeqytetit të Arabisë Saudite, është goditur sërish të shtunën nga një sulm me raketë, duke shkaktuar plagosjen e disa personave. Pas incidentit, autoritetet pezulluan operacionet në aeroport, ndërsa ekipet përkatëse nisën vlerësimin e dëmeve dhe të numrit të të lënduarve.
Sipas Associated Press, raketa goditi kompleksin ku ndodhen terminalet 3 dhe 4, të përdorura për fluturimet e brendshme. Në zonë u panë disa ambulanca, ndërsa prania e forcave të policisë u shtua dhe hyrjet e aeroportit u bllokuan.
Pezullimi i fluturimeve u njoftua nga autoritetet e aviacionit civil dhe, sipas një njoftimi zyrtar për aviatorët, do të zgjaste deri në mesnatë. Disa fluturime u devijuan drejt aeroporteve të tjera, ndërsa SHBA-ja, Britania e Madhe, Gjermania, Australia dhe Kanadaja u këshilluan qytetarëve të shmangin aeroportin.
Sulmi vjen vetëm pak ditë pasi tre shtetas sauditë, mes tyre edhe një pilot, humbën jetën në sulme të mëparshme. Rebelët Huthi, të mbështetur nga Irani, kanë marrë përsipër sulmet e kësaj jave ndaj aeroporteve, objekteve ushtarake dhe infrastrukturës së naftës në Arabinë Saudite.
Përshkallëzimi i sulmeve vjen në një kohë kur koalicioni i udhëhequr nga Arabia Saudite ka intensifikuar ofensivën ushtarake kundër Huthëve në Jemen. Konflikti po shton shqetësimet për sigurinë në rajon dhe për ndikimin e tij në tregjet ndërkombëtare të energjisë.
Presidenti amerikan Donald Trump deklaroi se Uashingtoni po shqyrton mundësinë e përfshirjes në sulmet saudite kundër rebelëve. “Mund ta bëjmë. Do ta shqyrtojmë”, u shpreh ai, duke shtuar se vendimi do të merret pas vlerësimit të situatës.
