Një situatë e tensionuar është regjistruar në shkallët e stadiumit “Air Albania”, ku pamjet e publikuara tregojnë efektivë të Policisë duke ushtruar dhunë ndaj tifozëve të Tiranës.
Pas ndërhyrjes së policisë, tifozët dëgjohen duke thirrur në kor “Poshtë komunizmi”, në një moment tensioni që ka shoqëruar derbin e kryeqytetit mes Partizanit dhe Tiranës.
Deri më tani, nuk dihen arsyet që çuan në ndërhyrjen e efektivëve dhe as rrethanat e plota të incidentit të regjistruar në shkallët e stadiumit.
Kjo ngjarje vjen pas tensioneve të shënuara që përpara ndeshjes, kur tifozë të Tiranës dhe Partizanit u përfshinë në përplasje pranë stadiumit. Mediat raportuan se policia ndërhyri për të normalizuar situatën dhe shoqëroi disa persona. Megjithatë, nuk ka konfirmim se pamjet e reja lidhen drejtpërdrejt me ato incidente.
Ndërkohë, në fushën e lojës, Tirana arriti të triumfojë me rezultatin 1-3 ndaj rivalëve të Partizanit, duke marrë një fitore të rëndësishme në derbin e kryeqytetit.
Pavarësisht rezultatit në favor të bardhebluve, pamjet e dhunës ndaj tifozëve ngrenë pikëpyetje mbi rrethanat e ndërhyrjes policore dhe përdorimin e forcës brenda ambienteve të stadiumit.
<iframe width=”337″ height=”599″ src=”https://www.youtube.com/embed/AA-ktLnqUa0″ title=”Policia dhunon tifozët e Tiranës në shkallët, ata shpërthejnë në kor: Poshtë komunizmi!” frameborder=”0″ allow=”accelerometer; autoplay; clipboard-write; encrypted-media; gyroscope; picture-in-picture; web-share” referrerpolicy=”strict-origin-when-cross-origin” allowfullscreen></iframe>
