Fëmijët janë grupmosha më e rrezikuar nga varfëria në Shqipëri, me shifra që ngrenë shqetësim për kushtet ekonomike në të cilat rritet brezi i ri. Sipas të dhënave të INSTAT, vitin e kaluar 26.2% e fëmijëve nga 0 deri në 17 vjeç ishin në rrezik varfërie, që do të thotë më shumë se një në katër fëmijë. Për krahasim, te personat e moshës 18-64 vjeç kjo shifër ishte 18.5%, ndërsa te qytetarët mbi 65 vjeç zbriste në 14%.
Të dhënat tregojnë se familjet me fëmijë përballen me një barrë të madhe ekonomike, pasi të ardhurat duhet të mbulojnë ushqimin, veshmbathjen, shkollimin, transportin dhe shpenzimet shëndetësore. Situata bëhet edhe më e vështirë kur punon vetëm njëri prind, pagat janë të ulëta ose puna është e pasigurt. Ndërsa një pjesë e pensionistëve kanë të ardhura të rregullta nga pensionet, fëmijët varen plotësisht nga ekonomia e familjes. Megjithatë, kjo nuk do të thotë se të moshuarit jetojnë më mirë, pasi treguesi mat rrezikun e varfërisë relative dhe jo nëse të ardhurat mjaftojnë për të përballuar të gjitha nevojat.
Pasojat e varfërisë mund të ndihen për vite me radhë, duke kufizuar mundësitë e fëmijëve për ushqyerje të mirë, arsim cilësor dhe zhvillim të shëndetshëm. Të dhënat tregojnë gjithashtu se gratë mbi 65 vjeç janë më të rrezikuara nga varfëria sesa burrat e së njëjtës grupmoshë: përkatësisht 15.1% kundrejt 12.9%. Shifrat nënvizojnë nevojën për më shumë mbështetje ekonomike për familjet me të ardhura të ulëta, veçanërisht ato me fëmijë, në mënyrë që varfëria të mos kthehet në një problem që trashëgohet nga një brez te tjetri
