Një qytetar i është drejtuar redaksisë sonë për të denoncuar gjendjen në të cilën ndodhet Ambulanca e Bathores, në Lagjen nr. 1.
Përmes një mesazhi të dërguar në redaksi, qytetari shprehet i habitur që, sipas tij, deri më sot nuk është folur për kushtet në këtë ambient shëndetësor.
Pamjet e dërguara nga qytetari tregojnë një situatë shqetësuese: mure të plasaritura nga lagështira dhe myku, dyshek krevati të dëmtuar e të grisur, si dhe suva të rëna në dysheme.
“Nuk kam nevojë të flas fare, mund ta shikoni vetë gjendjen“, shprehet qytetari, i cili ka kërkuar të mbetet anonim.
Banorët meritojnë ambiente shëndetësore të përshtatshme dhe higjienike, ku të mund të marrin shërbimin e nevojshëm pa u përballur me kushte të tilla.
Pritet një reagim nga institucionet përgjegjëse për verifikimin e situatës dhe marrjen e masave për përmirësimin e kushteve në këtë ambulancë.
