Një shqetësim serioz për ndotjen e mjedisit vjen nga banorët që jetojnë pranë fabrikës Edil Centro. Përmes një denoncimi të mbërritur në redaksinë tonë, qytetarët shprehin indinjatën për situatën që, sipas tyre, po përkeqësohet për shkak të tymit që çlirohet nga oxhaku i fabrikës.
Sipas denoncuesit, oxhaku i fabrikës është tepër i shkurtër dhe kjo bën që tymi të mos largohet nga zona e banuar, por të përhapet në ambientet ku jetojnë qytetarët.
Banorët thonë se janë të detyruar të përballen çdo ditë me këtë situatë, e cila po ua vështirëson ndjeshëm jetesën.
“Fabrika Edil Centro, me këtë oxhak kaq të shkurtër, po na mbyt dhe po e bën jetesën të pamundur. Pronari i Korporatës Atlas po luan me shëndetin e banorëve”, shprehet qytetari në denoncimin e tij.
Shqetësimi i banorëve nuk lidhet thjesht me tymin që shohin të dalë nga oxhaku, por edhe me mungesën e informacionit mbi përbërjen e emetimeve dhe ndikimin e mundshëm të tyre në shëndetin e komunitetit.
Në këto kushte, lind nevoja për një kontroll të plotë nga institucionet kompetente, për të verifikuar nëse fabrika respekton standardet mjedisore, nëse disponon sistemet e nevojshme të filtrimit dhe nëse emetimet e saj janë brenda normave të lejuara.
Por ku janë institucionet që duhet të mbrojnë qytetarët?
Banorët presin që Agjencia Kombëtare e Mjedisit dhe Inspektorati përgjegjës të reagojnë, të kryejnë matje të cilësisë së ajrit dhe të bëjnë publike rezultatet e kontrolleve. Nëse konstatohen shkelje, kërkohet marrja e masave përkatëse.
Ndërkohë, edhe drejtuesit e fabrikës Edil Centro dhe përfaqësuesit e Korporatës Atlas duhet të japin një përgjigje për shqetësimet e ngritura nga komuniteti.
Askush nuk duhet të detyrohet të zgjedhë mes vendit ku jeton dhe shëndetit të tij. Aktiviteti ekonomik dhe industrial duhet të zhvillohet duke respektuar mjedisin dhe mbi të gjitha të drejtën e qytetarëve për të jetuar në kushte të sigurta.
