Një ditë pasi Gjykata e Posaçme e Apelit e dënoi me 7 vite e 4 muaj burg për korrupsion dhe pastrim parash, ish-shefi i Forcave Operacionale, Oltion Bistri, nuk është gjetur në banesë nga policia.
Efektivët kanë tentuar të ekzekutojnë vendimin e gjykatës dhe ta rikthejnë pas hekurave ish-zyrtarin e lartë të policisë, por nuk e kanë gjetur në banesë. Deri më tani, nuk ka një informacion zyrtar për vendndodhjen e tij, ndërsa vendimi për rikthimin në burg mbetet ende i paekzekutuar.
Sipas përllogaritjeve të prokurorëve të SPAK, Bistrit i kanë mbetur për të vuajtur edhe 3 vite, 10 muaj e 14 ditë burg.
Vendimi i Apelit përmbysi atë të Shkallës së Parë, e cila në nëntor të vitit 2025 e kishte dënuar Bistrin vetëm për zbulimin e akteve apo të dhënave sekrete, duke e shpallur të pafajshëm për korrupsion dhe pastrim parash. Në atë kohë, për shkak të kohës së kaluar në paraburgim, ai ishte liruar nga qelia.
Por Apeli e shpalli fajtor edhe për korrupsion pasiv dhe pastrim të produkteve të veprës penale. Gjykata caktoi fillimisht 5 vite burg për korrupsionin dhe 7 vite për pastrimin e parave. Pas bashkimit të dënimeve, masa u përcaktua në 11 vite burg, e cila u reduktua në 7 vite e 4 muaj për shkak të gjykimit të shkurtuar.
Përveç dënimit me burg, gjykata vendosi edhe konfiskimin e pasurive të sekuestruara gjatë hetimeve. Në janar 2024, SPAK kishte sekuestruar pasuri me vlerë rreth 1 milion euro në emër të Bistrit dhe familjarëve të tij.
Ish-shefi i Operacionales u arrestua më 27 korrik 2023, në kuadër të operacionit “Metamorfoza”, së bashku me biznesmenin Pëllumb Gjoka, ish-prokurorin Xhevahir Lita, ish-policin Ardit Hasanbega dhe persona të tjerë.
Hetimet e SPAK, të zhvilluara edhe me mbështetjen e autoriteteve ndërkombëtare, zbuluan komunikime në aplikacionin e koduar SKY ECC. Sipas dosjes hetimore, Bistri i përcillte biznesmenit Pëllumb Gjoka informacione konfidenciale mbi veprimtarinë e policisë, aksionet e planifikuara dhe denoncimet që bëheshin ndaj bizneseve të tij.
Në të njëjtën dosje, Apeli la në fuqi edhe dënimet për të pandehurit e tjerë. Behar Bajri u dënua me 8 vite e 8 muaj burg, Astmer Bilali me 5 vite e 8 muaj, ndërsa Edmond Preka me 7 vite burg.
Dosja “Metamorfoza” përfshin hetime për një rrjet të dyshuar kriminal dhe një sërë veprash të rënda penale, mes tyre vrasje, trafik narkotikësh, korrupsion dhe pastrim parash.
