Anglia ka shkaktuar një humbje të bujshme për Spanjën, duke e mposhtur me rezultatin 3-2 në Madrid, në ndeshjen e fundit të Grupit A3 të Ligës së Kombeve. Përtej fitores, rezultati i dha fund një prej serive më të jashtëzakonshme në historinë e futbollit ndërkombëtar.
Spanja vinte në këtë përballje pas 43 ndeshjesh radhazi pa humbje në të gjitha kompeticionet, në kohën e rregullt dhe shtesë. Kjo seri, e cila përfshinte edhe miqësoret, kishte nisur pas humbjes 1-0 ndaj Kolumbisë në mars të vitit 2024 dhe i kishte dhënë Spanjës rekordin botëror për kombëtaret, duke kaluar serinë e mëparshme prej 37 ndeshjesh të Italisë.
Në fushën e stadiumit Metropolitano, anglezët zhvilluan një pjesë të parë të shkëlqyer dhe kaluan në avantazh në minutën e 45-të, kur Harry Kane shënoi nga pika e bardhë e penalltisë.
Në pjesën e dytë, Ezri Konsa në minutën e 53-të dhe Ben White në të 58-ën e çuan rezultatin në 3-0, duke i dhënë Anglisë një epërsi të konsiderueshme.
Megjithatë, Spanja reagoi. Në minutën e 64-t, Elliot Anderson u ndëshkua me karton të kuq pas një faulli ndaj Lamine Yamal brenda zonës, ndërsa Mikel Oyarzabal shndërroi në gol penalltinë e akorduar. Në minutën e 75-të, Nico Williams shënoi golin e dytë për spanjollët, duke rihapur ndeshjen. Pavarësisht presionit të vendasve, Anglia me dhjetë lojtarë arriti ta ruante avantazhin deri në fund.
Me këtë fitore, Anglia e mbylli grupin me 15 pikë, po aq sa Spanja, por e kaloi në vendin e parë falë golavarazhit. Të dyja kombëtaret kanë siguruar kualifikimin në çerekfinalet e Ligës së Kombeve.
