Edi Rama shigjeton Lalin: Heq nga puna punonjësit se s'i bëjnë Like

Edi Rama shigjeton Lalin: Heq nga puna…

Kryeministri Edi Rama ka ashpërsuar ndjeshëm tonet ndaj kryebashkiakut të paraburgosur të Tiranës, Erion Veliaj, gjatë mbledhjes së sotme të Asamblesë së Partisë Socialiste, duke shënuar një përshkallëzim të fortë të përplasjes së hapur politike mes tyre.

Gjatë fjalës së tij, kryeministri akuzoi drejtpërdrejt Veliajn dhe drejtuesit e Bashkisë së Tiranës për penalizimin dhe largimin arbitrar nga puna të punonjësve të administratës, duke përmendur konkretisht rastin e drejtoreshës së Policisë Bashkiake, Elona Lala. Sipas Ramës, këto shkarkime po bëhen me porosi nga larg, për shkak se punonjësit nuk shpërndajnë apo pëlqejnë në rrjetet sociale mesazhet që Veliaj publikon nga paraburgimi, ose sepse nuk zbatojnë udhëzimet e avokatit të tij.

Me tone të forta ironike, kreu i qeverisë i cilësoi reagimet e kryebashkiakut nga burgu i Fierit si “dorëshkrime nga burgu imagjinar politik”, duke i dërguar njëkohësisht një paralajmërim publik. “Uroj që Erioni ta kuptojë se është në gabim ditë e natë në raport me mua dhe në raport me PS-në”, u shpreh Rama.

Ai deklaroi gjithashtu se Partia Socialiste nuk do të tolerojë goditjen e asnjë punonjësi në krye të detyrës, pavarësisht bindjeve të tyre partiake, dhe paralajmëroi se përgjegjësit e këtyre shkarkimeve në bashki do të gjykohen me ashpërsinë më të madhe politike.

Kjo deklaratë vjen pas një periudhe tensioni të lartë brenda radhëve të mazhorancës. Erion Veliaj ndodhet në paraburgim që prej shkurtit të vitit 2025 pas hetimeve të SPAK, por vijon të mbajë detyrën e kryebashkiakut pas një vendimi të Gjykatës Kushtetuese që rrëzoi shkarkimin e tij.

Marrëdhëniet mes tij dhe kryeministrit Rama kanë pësuar krisje të dukshme pas shkëputjes së Veliajt nga drejtimi politik i PS-së për qarkun e Tiranës, vizitës së ministrit të Drejtësisë, Toni Gogu, në qelinë e tij në fund të tetorit 2026, si dhe letrave e reagimeve publike të kryebashkiakut kundër kreut të qeverisë.

Më Të Klikuarat


Lajmet e fundit