Të dielën në mbrëmje u vra në Londër, 27-vjeçari shqiptar Lumturi Zeqja. I riu vdiq në vendin e ngjarjes, pranë një lokali në Leytonstone ndërsa një mik i tij rreth të 20-tave mbeti i plagosur.
Familjarët e të ndjerit kanë treguar për mediat britanike se Lumi(siç e thërrisnin ata) u vra pasi ndërhyri për të shpëtuar shokun e tij që u përfshi në një sherr në lokalin ku ndodheshin.
Policia dhe një ambulancë shkuan në vendngjarje në Church Lane rreth orës 23:00 pasi një telefonues i njoftoi ata për sherrin e ndodhur. Shqiptari vdiq në vendngjarje ndërsa shoku i tij u dërgua me urgjencë në spital ku tani ndodhet në gjendje të qëndrueshme.
Deri më tani asnjë arrestim nuk është bërë për vrasjen e shqiptarit edhe pse policia thotë se po heton në pista të ndryshme.
