Në Gjykatën e Posaçme është zhvilluar seanca për masat e sigurisë ndaj Fatjon Kalluçit dhe Embro Sulejmanit, të dy të dyshuar në kuadër të hetimeve për dosjen e Ergys Agasit.
Gjatë seancës, Sulejmani ka mohuar të ketë kryer ndonjë veprim kriminal, duke iu referuar edhe akuzave që lidhen me marrëdhënien e tij me Agasin. “Nuk e di çfarë krimi kam bërë unë, që i kam çuar supë e ushqim”, është shprehur ai. Sulejmani ka deklaruar gjithashtu se e njeh Agasin, pasi të dy janë nga Durrësi.
Ndërkohë, oficeri i Policisë Shkencore, Fatjon Kalluçi, ka deklaruar se nuk kujton të ketë dërguar akte sekrete te Ergys Agasi, siç pretendohet nga SPAK.
Gjykata e Posaçme ka vendosur masën “arrest në burg” për Kalluçin, përgjegjës i Policisë Shkencore, dhe për Sulejmanin. Ata akuzohen për “veprime që pengojnë zbulimin e së vërtetës” dhe “përkrahje të autorit të krimit”, në kuadër të hetimeve për dosjen ndaj Ergys Agasit.
Në orën 12:00 pritet të zhvillohet edhe seanca ndaj ish-drejtueses së Shërbimit Informativ të Shtetit, Vora Hyseni. Ajo do të dalë para gjykatës për t’u marrë në pyetje, ndërsa do të verifikohen masat e sigurisë të dhëna në mungesë ndaj saj, “arrest në shtëpi” dhe “pezullim nga detyra”.
Hyseni dyshohet për “përkrahje të autorit të krimit” dhe “nxjerrje të sekretit shtetëror”.
