Një vajzë 5 vjeçare me origjinë shqiptare ka humbur jetën, ditën e djeshme, në Lechena të Greqisë. Aksidenti tragjik ndodhi kur vogëlushja doli në rrugë për të mbledhur lulëkuqe, ku një automjet e përplasi dhe e tërhoqi zvarrë.
Vajza u transferua menjëherë në Qendrën Shëndetësore “ Bardas”, ku fatkeqësisht, mjekët konstatuan vdekjen e saj.
Drejtuesi i automjetit u arrestua dhe u dërgua në stacionin policor “Andravida Kyllini”.
Prindërit e 5-vjeçares janë në gjendje shoku. Bledi dhe Dorina, me origjinë shqiptare, kanë jetuar në Greqi për më shumë se tridhjetë vjet.
“Ata kanë punuar shumë për të rritur fëmijët,” thonë fqinjët e tyre.
Çifti punonte në serrat e shalqirit në zonën midis Droselit dhe Moschonerit. Ata kishin marrë me vete vajzën e tyre të vogël, Klaudia, që sapo ishte kthyer nga kopshti, ndërsa djali i tyre, ndodhej në shkollë.