Albana Fico është larguar nga drejtimi i Qendrës Spitalore Universitare “Nënë Tereza”.
Nuk dihet ende arsyeja e largimit të Albana Ficos nga ky post. Albana Fico e mbante këtë post nga dhjetori i 2021. Ajo u emërua në krye të QSUT pas largimit nga drejtimi të Enkelejd Jotit. Largimi i saj vjen në kohën kur QSUT është përfshirë nga zjarri në urgjencën e re dhe kjo mendohet të jetë edhe arsyeja pse Rama e hoqi nga ky post.
Opozita ka akuzuar Ficon për skandalin, kurse deputetët e PD nuk u lejuan të hetojnë më tej këtë ngjarje të rëndë. Kreu i opozitës, Sali Berisha, tha se Edi Rama e mori në mbrojtje Ficon, pasi kjo e fundit është motra e ish-partneres së tij.
Urgjenca në spitalin e sëmundjeve të brendshme në QSUT është jashtë funksionit prej 11 shkurtit, kur në katin -1 të saj ra një zjarr. Shkaqet e zjarrit po hetohen nga Prokuroria e Tiranës, ndërsa drejtoria nuk mori masa pas ngjarjes për menaxhimin pa vonesa të urgjencave. 44 ditë që nga rënia e zjarrit, qytetarët sorollaten, teksa u vonohet ndihma e shpejtë.
50 deri në 60 raste në 24 orë dërgohen tek Urgjenca e Traumës, pasi nuk marrin shërbimin tek Urgjenca e Sëmundjeve të Brendshme. Shërbimi i Urgjencës është pjesë integrale e Spitalit të Ri të Sëmundjeve të Brendshme. Godina 7-katëshe u mor në dorëzim nga Ministria e Shëndetësisë vetëm pak muaj më parë.
Kryeministri Edi Rama ka deklaruar më herët se Spitali i ri i Sëmundjeve të Brendshme (dhe Urgjenca e Re) përbëjnë investimin më serioz në Shëndetësi në 30 vitet e fundit. Investimi për Spitalin e Ri në Qendrën Spitalore Universitare ka kushtuar rreth 17 milionë euro. Nga kjo vlerë, më shumë se 11 milionë euro janë shpenzuar për godinën dhe pjesa tjetër për aparatura spitalore.
