Mbi 20 familjarë, mes tyre edhe fëmijë, janë duke pritur në radhë pranë Ambasadës Shqiptare në Belgjikë, në pritje për të përfunduar procedurat e tyre konsullore.
Qytetarët kanë mbërritur nga qytete të ndryshme të Belgjikës për t’u paraqitur pranë ambasadës dhe për të kryer shërbimet për të cilat kanë udhëtuar. Por pritja është shoqëruar me vështirësi, pasi sistemi kompjuterik për kryerjen e procedurave nuk po funksionon ose nuk është i disponueshëm për të gjithë qytetarët në mënyrën e nevojshme.
Situata bëhet edhe më problematike për familjet që janë paraqitur së bashku me fëmijët, të cilët duhet të qëndrojnë për një kohë të gjatë në pritje. Për shumë prej tyre, kjo nënkupton jo vetëm humbje kohe, por edhe vështirësi për shkak të udhëtimit nga qytete të ndryshme deri në ambientet e ambasadës.
Qytetarët presin që procedurat të vijojnë dhe të mund të marrin shërbimet për të cilat janë paraqitur, pa qenë të detyruar të rikthehen një ditë tjetër, duke përballuar sërish kostot dhe vështirësitë e udhëtimit.
Kjo situatë rikthen në vëmendje nevojën për një organizim më të mirë të shërbimeve konsullore dhe funksionimin normal të sistemit kompjuterik, në mënyrë që qytetarët shqiptarë që jetojnë në Belgjikë të mos përballen me pritje të gjata dhe pengesa në përfundimin e procedurave të tyre.
