Arabia Saudite do të marrë pjesë për herë të parë në Miss Univers 2024!
Kjo ngjarje është cilësuar si një moment historik dhe shumë i rëndësishëm për vendin i cili nuk u njeh shumë të drejta grave. Përfaqësuese e Arabisë do të jetë Rumy Alqahtani, modele e cila ka marrë pjesë edhe më parë në konkurset e bukurisë si përfaqësuese e vendeve të tjera.
Alqahtani e ka zbuluar pjesëmarrjen në konkursin ndërkombëtar të bukurisë me anë të një postimi në ‘Instagram’, ku shkruan: “Jam e nderuar të marr pjesë në konkursin Miss Universe 2024. Kjo është pjesëmarrja e Parë e Arabisë Saudite në konkursin Miss Univers”.
Kjo pjesëmarrje vjen pas disa hapave të ndërmarra nga mbretëria për të modernizuar ekonominë. Vitet e fundit vendimet e marra kanë inkurajuar zhvillimin e turizmit, duke hapur dyert për vizitorët e huaj. Tashmë Arabia Saudite i ka dhënë liri grave për të marrë patentë dhe drejtuar makinën, duke simbolizuar ndryshime të mëdha në normat shoqërore.