Ndeshja dramatike mes Argjentinës dhe Egjiptit në Kupën e Botës nuk u diskutua vetëm për golat dhe emocionet në fushë, por edhe për një episod jashtë saj që solli reagime të shumta.
Gjatë sfidës, disa tifozë argjentinas u shfaqën në tribuna duke valëvitur flamuj izraelitë para ekipit dhe tifozëve, një veprim që u interpretua nga shumë tifozë egjiptianë si një provokim, veçanërisht pas qëndrimeve të shprehura më herët nga stafi i kombëtares egjiptiane në mbështetje të Palestinës.
Përgjigjja nuk vonoi. Në sektorët ku ishin vendosur tifozët egjiptianë u shpalosën flamuj palestinezë, duke e kthyer atmosferën në stadium në një përplasje simbolesh politike përtej rivalitetit sportiv.
Përballja mes Argjentinës dhe Egjiptit ishte e tensionuar edhe në fushë, ku kampionët në fuqi siguruan kualifikimin me një përmbysje spektakolare 3-2 në minutat e fundit, pasi “Faraonët” kishin kryesuar 0-2.
