Arrestimet pjesë e dosjes së famshme 339, për vjedhjet e votave në Durrës nga komisionerët, ka sjellë edhe reagimin zyrtar të ambasadores së SHBA-ve në Tiranë, Yuri Kim.
Kim ka reaguar pas lëshimit të 22 urdhër-arresteve, që kanë të bëjë me vjedhjen e votave në Durrës dhe Shijak.
Sipas ambasadores, ky është një tjetër gur në rrugën e reformës në drejtësi.
“Puna e SPAK për çështjen 339 fillon të zbulojë lidhjet midis krimit të organizuar dhe korrupsionit.
Reforma në drejtësi vazhdon të ecë përpara dhe nuk mund të ndalet. Edhe një gur”,- shprehet Yuri Kim.
Bazuar në provat e administruara nga Gjykata e Posaçme për Korrupsionin dhe Krimin e Organizuar, u caktuan sot masat e sigurimit personal për 22 shtetas.
Ata janë kapur nga policia gjyqësore dhe konkretisht me “Arrest në burg” 11 shtetas, “Arrest shtëpie” për 8 shtetas dhe “detyrim paraqitje” për 3 shtetas.
/Gazetaatdheu.com/
