Në kuadër të një operacioni antidrogë të zhvilluar në zonën e Ungrejit, policia e Lezhës ka shoqëruar dhe po merr në pyetje Armando Ndrecën, vëllain e deputetit të Partisë Socialiste në këtë qark, Eduart Ndreca. Bashkë me të është shoqëruar edhe kunati i Armando Ndrecës, ndërsa operacioni është zhvilluar në fshatin Kashnjet të njësisë administrative Ungrej.
Policia e Lezhës pritet të dalë në një komunikim për mediat lidhur me këtë rast, ndërsa blutë vazhdojnë të kryejnë verifikime për përfshirjen e tij ose jo në këtë aktivitet. Operacioni është zhvilluar ditën e mërkurë, por ende nuk janë bërë të ditura rrethanat dhe detajet e mëtejshme të tij.
“U sekuestruan 2973 bimë narkotike (disa prej tyre fidanë të gatshëm për t’u kultivuar në tokë), një sasi lënde narkotike cannabis sativa, 50 llamba, pajisje ventilimi, sende të tjera që i shërbenin kësaj veprimtarie kriminale dhe 3 celularë. Më tej, në banesat e 2 të arrestuarve në flagrancë, Policia gjeti 3 armë të ftohta dhe 1 maskë”, thuhet në njoftimin e policisë.