Një baba nga Adelaide është cilësuar si hero, pasi shpëtoi vajzën e tij dyvjeçare nga një prej gjarpërinjve më vdekjeprurës në botë. Familja kishte qenë në shtëpinë e tyre në Tailem Bend kur një gjarpër iu afrua vogëlushes. Për të shpëtuar vajzën e tij të mitur, Jake Coombe u hodh para vajzës së tij dhe u pickua nga gjarpri helmues, i cili mendohej të ishte një nga gjarpërinjtë më vdekjeprurës në botë.
Gjarpri është aq helmues sa mund të vrasë fëmijët e vegjël dhe kafshët shtëpiake në pak minuta nëse nuk marrin menjëherë trajtim mjekësor. Sipas një studimi, gjarpri ngjyrë kafe lindore është përgjegjës për 60 për qind të të gjitha vdekjeve nga pickimi i gjarprit në Australi, më e fundit një grua 55-vjeçare në nëntor 2022, raporton ladbible.
Megjithatë, kjo nuk e ndaloi Coombe të hidhej para kafshës vdekjeprurëse për të shpëtuar vajzën e tij Alba. Familja kishte qenë jashtë atë ditë, kur Coombe ndjeu se diçka nuk shkonte dhe shkoi të kontrollonte korridorin ku vajza e tij e vogël kishte luajtur. Duke vënë re se dera e garazhit ishte ende e hapur, ai nxitoi drejt Albës dhe e gjeti vajzën e vogël ballë për ballë me gjarpërin vdekjeprurës. Ndërsa ajo shkoi për ta goditur, babai heroik e tërhoqi vajzën e tij në krahë dhe u kafshua në këmbë nga gjarpri.
Coombe kaloi natën në spital për t’u shëruar, dhe teksa foli për këtë histori tha: “Ndoshta do të kishte qenë një histori tjetër nëse do të ishte pickuar Alba. Më mirë unë se ajo, kjo është e sigurt.”
Mendohet se gjarpri po përpiqej t’i shpëtonte përmbytjeve të rënda përgjatë lumit Murray dhe autoritetet u kanë thënë banorëve që të qëndrojnë në gatishmëri të lartë për gjarpërinjtë.
