Tubimi masiv me qytetarë në Durrës nga kreu i opozitës, Lulzim Basha, ka sjellë edhe reagimin e kryeministrit Edi Rama.
Teksa poston foto nga pamjet e këtij takimi me qytetarë të shumtë, Rama shkruan: “Të rrezikosh shëndetin dhe jetën e njerëzve për të luajtur një pllakë gramafoni”.
Pas deklaratës së Ramës, reagoi edhe Sekretari i Përgjithshëm i PD, Gazment Bardhi. “Rama është i tmerruar nga bashkimi i shqiptarëve,” tha Bardhi. DEKLARATA:
Edi Rama nuk tmerrohet nga shndërrimi i QSUT-së në vatër infeksioni për dhjetëra pacientë, mjekë dhe infermierë.
Është fakt se sot vatra e vetme e infeksionit masiv është spitali, që duhet të ishte vendi më i sigurtë e ku masat të ishin me rigoroze.
Edi Rama nuk tmerrohet nga varfëria e shqiptarëve dhe nga papunësia masive e tyre.
Edi Rama e përdori coronavirusin për të shtypur, vjedhur dhe gënjyer qytetarët. Është fakt se Edi Rama është i vetmi Kryeministër në botë që vjedh me tendera sekret e koncesione për oligarkët, dhe urdhëron prishjen e Teatrit në mes të pandemisë.
Ndaj Edi Rama ka të drejtë të tmerrohet nga bashkimi i shqiptarëve, që i la pa asnjë ndihmë, pa asnjë mbrojtje, dhe i vodhi e varfëroi edhe gjatë izolimit.
Propaganda bajate nuk e mbulon dot revoltën e qytetarëve në çdo cep të vendit. Pushteti kriminal, që lë shqiptarët pa asnjë qindarkë ndihmë në ditën e tyre më të keqe, është drejt fundit.
