Aksionaret e kompanive ‘Fiat Chrysler Automobiles’ dhe ‘Group PSA’, prodhuesi francez i makinave Peugeot dhe Citroën, miratuan shkrirjen me njëra-tjetrën në një marrëveshje prej 58 miliardë dollarësh që do t’i kthejë ata në prodhuesin e katërt më të madh të makinave në botë.
Ndërmarrja e sapokombinuar do të quhet ‘Stellantis’. Bashkimi thuhet se do të gjenerojë miliarda dollarë kursime vjetore dhe do të rrisë zhvillimin e automjeteve elektrike dhe autonome, të cilat parashikohet të ndryshojnë në mënyrë drastike industrinë e automjeteve në të ardhmen e afërt.
Fiat Chrysler prodhon makina të tilla të njohura si Chrysler, Dodge, Jeep, Fiat, Alfa Romeo, Maserati dhe Lancia. Ndërkohë, PSA prodhon marka të automjeteve Peugeot, Citroën, DS, Opel dhe Vauxhall.
