Zëdhënësja e BE-së Kaja Kallas reagon pas sulmit të SHBA-së mbi bazat nukleare iraniane, duke bërë thirrje për zgjidhje diplomatike dhe shmangie të një përshkallëzimi të rrezikshëm
Pas goditjes së befasishme të Shteteve të Bashkuara mbi objektet bërthamore të Iranit, Bashkimi Evropian ka reaguar me shqetësim. Zëdhënësja e BE-së për çështjet e jashtme, Kaja Kallas, deklaroi se zhvillimet në Lindjen e Mesme paraqesin një rrezik të rëndë për paqen globale.
Sulmi ajror i ndërmarrë nga SHBA-ja mëngjesin e sotëm preku tre objekte kyçe: Natanzin, Fordowin dhe Isfahanin. Uashingtoni justifikoi ndërhyrjen si një masë për të ndalur Iranin nga zhvillimi i armëve bërthamore. Shkatërrimet janë të konsiderueshme dhe pritet të pasohen me reagime të forta nga Teherani.
Në një deklaratë publike, Kallas theksoi se “Irani nuk duhet të lejohet të zhvillojë armë bërthamore, pasi kjo përbën kërcënim serioz për sigurinë ndërkombëtare.” Ajo shtoi se tani është momenti për të gjithë aktorët të tërhiqen dhe t’i rikthehen tryezës së negociatave.
Brukseli mbështet fuqimisht zgjidhjen diplomatike të konfliktit mes Izraelit dhe Iranit, ndërsa njoftoi se ministrat e jashtëm të BE-së do të mblidhen nesër për të shqyrtuar situatën dhe hapat që do të ndërmerren.
Përballë rrezikut të përshkallëzimit të mëtejshëm, zyrtarët evropianë i kanë bërë thirrje Uashingtonit dhe Teheranit të shmangin provokimet dhe të veprojnë me përmbajtje.
Kjo ngjarje e rrit ndjeshëm tensionin në rajon, ndërkohë që komuniteti ndërkombëtar po përpiqet të shmangë një konflikt të hapur me pasoja të rënda globale. Bashkimi Evropian pritet të luajë një rol kyç në ndërmjetësimin e një zgjidhjeje paqësore.
