Pas rreth dy vitesh në kërkim, biznesmeni 50-vjeçar Renardo Nallbani u arrestua mbrëmjen e 8 gushtit në vilën e tij në Palasë, Dhërmi, ku ndodhej së bashku me familjen. Nallbani, një prej personave të akuzuar në dosjen e inceneratorit të Tiranës, u prangos nga Policia e Shtetit, ndërsa pamjet e arrestimit treguan sipërmarrësin me veshje të zakonshme verore. Në fillim të korrikut 2026, SPAK njoftoi se kishte dërguar për gjykim dosjen ndaj Nallbanit dhe 12 individëve e personave juridikë, të akuzuar për “pastrim të produkteve të veprës penale”, “grup të strukturuar kriminal” dhe “veprime në kuadër të grupit të strukturuar kriminal”. Në qendër të hetimit janë edhe Mirel Mërtiri dhe Klodian Zoto, të cilët SPAK i konsideron pronarë “de facto” të shoqërisë koncesionare të inceneratorit të Tiranës.
Sipas të dhënave të bëra publike nga hetimi, Nallbani dyshohet se ka pasur rol në menaxhimin e procesit të depozitimit të dherave dhe inerteve në landfillin e Sharrës, aktivitet nga i cili dyshohet se janë gjeneruar përfitime të konsiderueshme financiare. Lidhja e tij me grupin e inceneratorëve del edhe përmes bashkëshortes së tij, Edlira Nallbani, e cila në vitin 2017 krijoi shoqërinë “Edaril & Co Albania” së bashku me Ilza Zoton, bashkëshorten e Klodian Zotos, dhe Arenc Myrtezani, administrator i inceneratorit të Fierit. Kompania kishte si objekt ndërtimin e impianteve teknologjike, landfill-eve dhe impianteve të trajtimit të mbetjeve, ndërsa në vitin 2019 ndryshoi emrin në “7D” dhe strukturën e pronësisë. Sipas akuzës, depozitimi i dherave në landfillin e Sharrës u kthye në një burim të rëndësishëm të ardhurash, ndërsa ish-deputetja Jorida Tabaku ka deklaruar më herët se fitimet e kompanisë vetëm nga dherat arrinin në mbi 40 milionë euro.
SPAK ka bërë të ditur se nga zbatimi i kontratës koncesionare për landfillin dhe inceneratorin e Tiranës, nga viti 2017 deri në vitin 2023, shoqëria “Integrated Energy BV SPV” ka siguruar të ardhura prej 11.3 miliardë lekësh, ndërsa investimi për ndërtimin e objektit ka qenë rreth 21 milionë euro. Sipas prokurorisë, pronarët “de facto” Mirel Mërtiri dhe Klodian Zoto kanë nxjerrë para nga llogaritë e kompanisë përmes faturave fiktive, shoqërive fiktive dhe transferimeve cash, në shumën 1.28 miliardë lekë dhe 16.6 milionë euro. Në kuadër të këtij hetimi, Nallbani është përfshirë mes personave që SPAK akuzon se kanë bashkëpunuar me Mërtirin dhe Zoton në formën e një grupi të strukturuar kriminal. Megjithatë, për rolin konkret të Nallbanit në mekanizmin financiar të skemës, detajet e plota pritet të shqyrtohen gjatë procesit gjyqësor.
